Нийтэлсэн огноо: 2020 оны 03 сарын 27 15:00

Дэлхийн нийт худалдааны 80 хувь, ДНБ-ий 90 хувийг бүрдүүлдэг хамгийн хүчирхэг 20 гүрний төрийн тэргүүнүүд өчигдөр /2020.03.26/ цар тахлын хэмжээнд хүрээд буй коронавирусийн хямралын талаар цахимаар уулзаж нөхцөл байдлыг хэлэлцлээ. Тус уулзалтад төрийн тэргүүнүүдээс гадна НҮБ, ДЭМБ, Дэлхийн банк, Олон улсын валютын сан /ОУВС/ болон Олон улсын хөдөлмөрийн байгууллага /ОУХБ/ тэргүүтэй олон улсын хамтын нийгэмлэгийн тэргүүнүүд оролцсон юм.

Хэвлэлүүдэд хаалттай болсон энэ уулзалтын үр дүнд бүх улс орон энэхүү тахал өвчинтэй хамтын хүчээр тэмцэж байж хохирол багатай даван туулна гэдэг байр суурьт хүрчээ.

Ингээд тус уулзалтын үеэр дурдагдсан онцлох байр сууриудыг хүргэе.

  • ОХУ-ын Ерөнхийлөгч Владимир Путин коронавирусийн вакциныг бүтээхэд хамтарсан судалгаа хийх, ОУВС-гаас эдийн засгийн хохирол амссан улсуудад хүүгүй зээл олгох тусгай сан байгуулах, цар тахлын дэгдэлттэй тэмцэх чиглэлд “ногоон коридор”-ыг байгуулах, эрчим хүчний салбарт тулгарсан үнийн алдагдлыг бууруулахын тулд зарим олон улсын хориг арга хэмжээг яаралтай цуцлах зэрэг асуудлуудыг дэвшүүлэв
  • Цар тахлын улмаас дэлхийн эдийн засагт наад зах нь 4,8 их наяд ам.долларын хохирол учирч болзошгүйг талууд онцлов
  • Япон улсын Ерөнхий сайд Абэ Шинзо цар тахлын эсрэг эмчилгээнд анхаарлаа хандуулж хамтран ажиллахыг бусад улс орнуудад уриалав
  • НҮБ-ын Ерөнхий нарийн бичгийн дарга Антонио Гутерреш коронавирусийн хямрал дайны хэмжээнд хүрч, дэлхийн улс орнууд энэ дайнд ялагдаж байгааг анхааруулж, цаашид маш хурдтай, мэдрэмжтэй ажиллахгүй бол нөхцөл байдал 2008 оны дэлхийн санхүүгийн хямралаас ч хүнд тусахыг сэрэмжлүүлэв
  • АНУ-ын Ерөнхийлөгч Дональд Трамп улс орон бүр мэдээллээ ил тод нээлттэйгээр бусадтайгаа хуваалцахын чухлыг онцлов.
  • Хурлыг даргалагч Саудын Арабын хаан Салман хөгжингүй улс орнуудыг ядуу буурай улс орнуудад туслахыг уриалав
  • Хятадын дарга Ши Жиньпин их гүрнүүдэд хандан бараа бүтээгдэхүүний татвараа бууруулж, худалдааны хорио цээрийг арилгах нь дэлхийн эдийн засгийг дэмжих бодит алхам хэмээн онцлов
  • ОУВС-гийн захирал Кристалина Георгиева “Их-20”-ийн бүлгийн удирдагч нарт тус сангаас хөгжил буурай болон ядуу орнуудад дэмжлэг үзүүлэхээр төлөвлөсөн 50 тэрбум ам.долларын санхүүжилтийг хоёр дахин нэмэгдүүлэхэд дэмжлэг үзүүлэхийг уриалав.

Ийнхүү хуралдааны төгсгөлд талууд хамтарсан мэдэгдэл гаргаж, коронавирусийн улмаас үүссэн эдийн засгийн хямралыг даван гарахын тулд таван их наяд ам.долларын сан бүрдүүлэхээр тохиролцжээ.

 

Эх сурвалж: news.mn

Мэдээ